គុណវិបត្តិនៃការទទួលទានទឹកក្រូច (កូកាកូឡា)

នៅលើពិភពលោកសព្វថ្ងៃកំពុងតែញៀនទៅនឹងភេសជ្ជៈ កូកាកូឡា។ ​ វាត្រូវបានក្លាយជាម៉ាកល្បីល្បាញទូទាំងពិភពលោក ដោយគេសង្កេតឃើញមានមនុស្សទទួលទានភេសជ្ជៈនេះជាប្រភេទដប​ និង​កំប៉ុងចំនួន​ 1,6 លានជារៀងរាល់ថ្ងៃ។ នៅប្រទេសកម្ពុជាវិញ កូកាកូឡា គឺជាភេសជ្ជៈមួយបែបដែលពេញនិយមយ៉ាងខ្លាំងចំពោះប្រជាជានខ្មែរទូទៅ ជាពិសេសក្នុងស្រទាប់មនុស្សវ័យក្មេង វ័យជំទង់ និងវ័យកណ្តាល។ កូកាកូឡាត្រូវបានគេទទួលទានក្នុង      ឱកាសជួបជុំ ការជប់លៀង និងដំណើរកំសាន្តផ្សេងៗ។

ប៉ុន្តែតើអ្នកមានដឹងពីផលប៉ះពាល់របស់ភេសជ្ជៈប្រភេទនេះទៅលើសុខភាពអ្នកផ្ទាល់ដែរឬទេ?

យោងតាមគេហទំព័រ Dailymail ដែលជាគេហទំព័រពត៌មានមួយរបស់ប្រទេសអង់គ្លេស បានបង្ហាញពី     គុណវិប្បត្តិនៃការទទួលកូកាកូឡា។​ ខាងក្រោមនេះគឺជាផលប៉ះពាល់ចំនួនបួនចំណុចរបស់ភេសជ្ជៈនេះ៖

1.  ជំងឺមហារីក

ពណ៌របស់កូកាកូឡាផ្សំឡើងពីសារធាតុ 4-methylimidazole (4-MI) ដែលជាសារធាតុគីមីម្យ៉ាងប្រើនៅក្នុង​ផលិតកម្មការលាយពណ៌អាហារប្រភេទការ៉ាម៉ែល។ ក្រុមហ៊ុន កូកាកូឡា បានបកស្រាយថាភេសជ្ជៈនេះ មានសារធាតុនេះតែបន្តិចបន្តួចប៉ុណ្ណោះ។ ប៉ុន្តែរដ្ឋ Califonia បាន​បដិសេធ ដោយបានបកស្រាយថា ការសិក្សា បានបង្ហាញឱ្យឃើញថា បន្ទាប់ពីការស្រូបយកសារធាតុគីមីប្រភេទនេះរយៈពេលយូរ វានឹងធ្វើឱ្យមានបញ្ហាប្រឈមនឹងជំងឺមហារីក ចំពោះផលិតផលដែលមានកម្រិតសារធាតុច្រើនជាង 29​ មីលីសង់ទីក្រាម (mcg)។ កូកាកូឡា មានចំនួន 140 មីលីសង់ទីក្រាម ទោះបីក្រុមហ៊ុននេះបានបញ្ជាក់ថា បានកាត់បន្ថយខ្លះក៏ដោយ។

2.       ជាតិស្ករច្រើន

វេជ្ជបណ្ឌិតបានប្រាកដថា ផលប៉ះពាល់ធំបំផុតរបស់កូកាកូឡាគឺដោយសារមានជាតិស្ករច្រើន​ ដែលជាមូលហេតុបណ្តាលឱ្យមានការលើសទំងន់ ដែលជាមូលហេតុចម្បងមួយដែលនាំទៅកាន់ជំងឺមហារីកផងដែរ។ ភេសជ្ជៈនេះក៏ធ្វើឱ្យកើនឡើងនៃការប្រឈមនឹងជំងឺទឹកនោមផ្អែមប្រភេទទី២ ជំងឺបេះដូង និងជំងឺស្ត្រូកផងដែរ។ 

យោងតាមការសិក្សាទៅលើសត្វកណ្តុរក៏បានបញ្ជាក់ដែរថា ការទទួលទានជាតិស្ករច្រើនបណ្តាលឱ្យកើតមាន ជំងឺបាក់ទឹកចិត្ត ការចងចាំចុះខ្សោយផងដែរ។ មិនត្រឹមតែប៉ុណ្តោះ វាធ្វើឱ្យធ្មេញឆាប់ពុកទៀតផង។​ 

នៅពេលដែលអ្នកទទួលទានជាតិស្ករច្រើនដោយឆាប់រហ័សបែបនោះ វានឹងធ្វើឱ្យរាងកាយអ្នកទទួលសំពាធពីជាតិស្ករ (Sugar Rush) ដែលជាតិស្ករទាំងនេះ ត្រូវបានស្រូបដោយរាងកាយយ៉ាងលឿន។ បន្ទាប់មកអ្នកនឹងជួបនឹងការធ្លាក់ចុះនៅថាមពលភ្លាមៗ ដែលជំរុញឱ្យអ្នកត្រូវការទទួលទានភេសជ្ជៈនេះបន្ថែមទៀតដើម្បីបង្គ្រប់ជាតិស្ករ ដែលរាងកាយត្រូវការ។

**នៅក្នុងភេសជ្ជៈកូកាកូឡាមួយកំប៉ុង មានជាតិស្ករចំនួន ប្រាំបី ស្លាបព្រាកាហ្វេ!!

3. អាស៊ីតផូស្វរីក (Phosphoric Acid)

អាស៊ីតផូស្វរីកគឺជាសារធាតុគីមីម្យ៉ាងដែល ថ្លា គ្មានក្លិន ប្រើប្រាស់ដើម្បីឱ្យភេសជ្ជៈនេះមានរសជាតិជាប់មាត់ និងជួយកាត់បន្ថយជាតិផ្អែមខ្លាំងដោយសារតែការដាក់ជាតិស្ករដ៏ច្រើននោះ។ ប៉ុន្តែវាក៏ធ្វើឱ្យមានផលប៉ះពាល់ដល់រាងកាយផងដែរ។ យោងតាមការស្រាវជ្រាវនៅ U.S National Institutes of Health នៅឯ Maryland  បានរកឃើញថា ការទទួលទានភេសជ្ជៈនេះជារៀងរាល់ថ្ងៃ នឹងបង្កើនការប្រឈមទ្វេរឡើងទៅនឹង ដុំគ្រួសក្នុងតំរង់នោម។ ការសិក្សារបស់ប្រទេសអាមេរិកមួយក៏បានរកឃើញដែរថា ស្ត្រីដែលទទួលកូកាកូឡាជារៀងរាល់ថ្ងៃ ថយចុះនូវកម្រិតភាពរឹងមាំនៅក្នុងឆ្អឹងត្រគាករបស់ពួកគេចំនួន 4% ដែលទាបជាងស្ត្រីដែលមិនបានទទួលទាន។ នេះគឺដោយសារតែសារធាតុនេះរាំងស្ទះ នូវការប្រើប្រាស់និងការស្រូបយកកាល់ស្យូម ដែលមាននៅក្នុងអាហារដើម្បីបង្កើតឆ្អឹងថ្មី។

4. អាស៊ីត ស៊ីទ្រិក (Citric Acid)

ប្រសិនបើយើងនិយាយពីធ្មេញ ផលប៉ះពាល់នៃអាស៊ីតដែលមាននៅក្នុងភេសជ្ជៈកូកាកូឡា មានភាពស្រដៀងគ្នាច្រើនទៅនឹងផលប៉ះពាល់បណ្តាលមកពីអាស៊ីតដែលប្រើប្រាស់នៅក្នុងអាគុយដែរ។ ការទទួលទានភេសជ្ជៈនេះនឹងផ្តល់គុណវិបត្តិដល់អញ្ជាញធេ្មញ ពុកធ្មេញ និងធ្វើឱ្យធ្មេញងាយនឹងខ្មៅទៀតផង។ ការសិក្សាមួយស្តីពី General Dentistry  បានបង្ហាញថាភេសជ្ជៈនេះមានកម្រិត 10 ដងដែលធ្វើឱ្យធ្មេញឆាប់ខូច ប្រៀបធៀបទៅនឹងការទទួលទានទឹកផ្លែឈើ ក្នុងរយៈពេលបីនាទីដំបូងនៃការទទួលទាន។

ជាការពិសោធ អ្នកស្រាវជ្រាវបានយកធ្មេញដែលបានដកថ្មីៗ ហើយដាក់ចូលទៅក្នុងភេសជ្ជៈចំនួន 20 ប្រភេទខុសៗគ្នា។ ការពិសោធនេះរកឃើញថា ធ្មេញដែលដាក់ទៅក្នុងកូកាកូឡា ក្នុងរយៈពេល 48 ម៉ោង បានបាត់បង់ភាពរឹងមាំនិងទំងន់របស់វាចំនួន 5%។

ទាំងនេះគឺជាគុណវិបត្តិទាំងឡាយដែលបណ្តាលមកពីការទទួលទានភេជ្ជៈកូកាកូឡា ដូចនេះប្រសិនបើអ្នកចង់បានសុខភាពដែលល្អ សូមទទួលទានក្នុងកម្រិតទាបបំផុតតាមដែលអាចធ្វើទៅបាន។ ប្រសិនបើអ្នកមិនទទួលតែម្តង​ នោះវាកាន់តែប្រសើរ។